Puttalam Online
ladies

மன அழுத்தத்திற்கான காரணங்கள்

  • 16 February 2015
  • 1,260 views

Ummu Sulaim

குழந்தைகளுக்கு வரும் மன அழுத்தங்கள்

மன அழுத்தத்திற்கான காரணங்கள்.

குழந்தைகளின் மன அழுத்தத்தை அதிகமாக்கும் காரணங்கள் பலப்பல. தங்களுக்கு ஏற்பட்ட மன அழுத்தத்தை ஒவ்வொரு குழந்தையும் ஒவ்வொரு விதமாக வெளிப்படுத்துகின்றனர். சில குழந்தைகள் முகத்தை உம்மென்று வைத்துக்கொண்டு யாருடனும் பேசாமல் இருப்பார்கள். சில குழந்தைகள் தங்கள் மன அழுத்தத்தை கோபமாகவும், ஆத்திரமாகவும் வெளிக்காட்டுவார்கள். சில குழந்தைகள் எப்போதும் கவலையோடு காணப்படுவார்கள். இதற்கெல்லாம் காரணங்கள் இருக்கலாம் என்று குழந்தை மனநல மருத்துவர்கள் கூறுகின்றனர்.

• குடும்பத்தில் தொடர்ந்து நடைபெறும் குழப்பங்கள், பெற்றோருக்கிடையான வாக்குவாதங்கள்.

• பெற்றோர்கள் மற்றும் உறவினர்களுடன் குழந்தைகளுக்கு உறவில் ஏற்படும் விரிசல்.

• நட்பில் உண்டாகும் மனவருத்தம்.

• குடும்பங்கள் பிரிந்து விடுதல்.

• மிக நெருக்கமானவர்களின் பிரிவு அல்லது செல்லப்பிராணிகளின் இறப்பு.

• பெரிதாக ஏற்படும் இழப்புகள், அல்லது அதிர்ச்சி ஏற்படுத்திய நிகழ்ச்சிகள் படங்கள்.

• அடிக்கடி ஏற்படும் உடல் நோய்கள், தொற்று நோய்கள்.

• குழந்தைகளை மற்றவர்கள் தவறாகப் பயன்படுத்துதல்.

• மற்ற குழந்தைகளின் முரட்டுத்தனம், பிடிவாதம்.

• பள்ளியில் அல்லது வெளி வட்டாரத்தில் தொடர்ந்து ஏற்படும் தோல்விகள்.

• பெற்றோரை பாதிக்கும் மன உணர்வுகள் சில நேரங்களில் குழந்தையையும் பாதிக்கும்.

• உட்கொண்ட மருந்துகளினால் ஏற்படும் விளைவுகள்.

இது போன்ற காரணங்களினால் குழந்தைகள் மன அழுத்த நோய்களுக்கு ஆளாகி அவதிப்படுர். சில குழந்தைகளுக்கு இது பரம்பரையாகவும் வரலாம். அத்தகைய குழந்தைகள் மேலே காட்டப்பட்ட காரணங்களுள் ஏதேனும் ஒன்று ஏற்பட்டால் கூட அதை ஏற்றுக்கொள்ளவோ அல்லது சமாளிக்கவோ முடியாமல் அதிகம் திணரிபோய் விடுவார்கள். வெகு விரைவில் மன அழுத்த நோய்க்கும் ஆளாகி விடுவார்கள்.

நீங்கள் செய்ய வேண்டியவை

மன அழுத்தத்தினால் பாதிக்கப்பட்ட குழந்தைகள் பெற்றோருடன் பேச விரும்ப மாட்டார்கள். இருந்த போதிலும், அவர்களுடன் நேரடியாகவோ அல்லது அவர்கள் விரும்புகின்ற நண்பர் அல்லது உறவினர் மூலமாகவோ பேசுவது நன்மைகளை ஏற்படுத்தும். இவ்வாறு பேசுவதன் மூலமாக அவர்களுக்கு மன அழுத்த்ததை உண்டாக்கியது எது என்பதை அறிவதற்கு வாய்ப்பு எற்படும். அவர்களுடன் உரையாடலில் ஈடுபடும் நேரத்தில் சில விஷயங்கள் மிகவும் முக்கியமானவை.
அவையாவன:-

• அவர்கள் சொல்வதை மிகவும் கவனமாக கேட்க வேண்டும். இது சொல்வதற்கு மிகவம் எளிது, ஆனால் செயல்படுத்துவது கடினம்.

• அவர்கள் மனதில் இருப்பதை பேசிக்பொண்டிருக்கும் போது நடுவே குறுக்கிடுவது, எனக்கு அப்பவே தெரியும் என்பது, அது தான் நீ எப்போதும் செய்யும் தப்பு என்பது,சரியான முட்டாள் நீ என்று அதட்டுவது போன்ற வார்த்தைகளை பயன்படுத்தக்கூடாது.

• அவர்கள் நினைப்பதை அவர்களது சொந்த வார்த்தைகளின் மூலமாகவே வெளிப்படுத்த அனுமதியளிக்க வேண்டும். அவர்கள் சொல்லி முடிக்கும் வரையில் பொறுமையாக காத்திருக்க வேண்டும். அவர்கள் பேசுவதை கொண்டு எப்படியெல்லாம் கற்பனை செய்திருக்கிறார்கள் என்பதைப்புரிந்து கொள்ள வேண்டும்.

• குழந்தைகள் சொல்லும் விஷயத்தை தெளிவாகப்புரிந்து கொள்ள அவ்வப்போது சிறு கேள்விகள் கேட்கலாம். ஆனால் அது அவர்கள் பேசுவதை தடுப்பதாகவோ, எண்ணத்தை திசை திருப்புவதாகவோ இருக்க்ககூடாது.

• ஆதரவு வார்த்தைகள், நம்பிக்கை ஊட்டும் வார்த்தைகளைச்சொல்லி அவர்களுக்கு ஊக்கத்தை ஏற்படுத்த வேண்டும்.

• நான் உன்னை ஒரு வாரமாக கவனித்து வருகிறேன், நீ மிகவும் கவலையோடு இருக்கிறாய் என்று சொல்ல வேண்டும். இவ்வாறு சொல்வதன் மூலமாக பெற்றோர் தன்னை கவனித்து வருகிறார்கள், தனது நலனில் அக்கரை கொள்கிறார்கள் என்பதை குழந்தைகள் புரிந்து கொள்வார்கள். இந்த எண்ணம் அவர்கள் மன அழுத்தத்தில் இருந்து விடுபட பெரிதும் உதவும்.

இவ்வாறு அவர்களுடன் கலந்துரையாடி மன அழுத்தத்திற்கான காரணத்தை அறிந்துகொண்ட பிறகு நீங்கள் அதைப்பொக்குவதற்கான செயல்களில் ஈடுபட வேண்டும்.

மன அழுத்தம் தடுக்கும் முறைகள்

• மன அழுத்தத்தில் இருந்து அவர்களை விடுவிப்பதற்காக நீங்கள் செயல்படுவதை அவர்களுக்கு முதலில் உணர்த்துங்கள்.

• இதன் மூலமாக அவர்களுடைய சரியான ஒத்துழைப்பை நீங்கள் பெறமுடியும்.

• குழந்தைகள் அடிக்கடி தங்களை குறைகூறிக்கொண்டால், அவ்வாறு நினைக்க வேண்டிய அவசியம் இல்லை என்பதை தெளிவுபடுத்துங்கள்.

• தேவைப்பட்ட மாறுதல்களை உண்டாக்குங்கள், உதாரணமாக தொல்லை கொடுக்கும் நண்பர்களை மாற்றுவது. வகுப்பறையில் வம்பு செய்யும் மாணவனை விலக்க, உங்கள் மகனை வேறு இடம் மாறி உட்கார வைப்பது.புதிய நண்பர்களை அறிமுகம் செய்து வைப்பது. புதிய இடங்களுக்கு அழைத்துச்செல்வது. புதிய விளையாட்டுக்களில் ஈடுபடுத்துவது. வளர்ப்பு பிராணிகளை பரிசளிப்பது போன்றவை.

• தங்களுக்கு தேவையான பாதுகாப்பும், உதவியும், கிடைப்பதை உணர்ந்ததும் குழந்தைகள் மன அழுத்தத்தில் இருந்து விடுபடுவார்கள்.

• பெற்றோரின் மரணம், விவாகரத்து, எதிர்பாராத அதிர்ச்சி போன்றவைகளினால் மன அழுத்த நோய்க்கு ஆளான குழந்தைகள் நீண்டகால சிகிச்சைக்குப் பிறகே நோயிலிருந்து விடுபடுவார்கள்.

• குழந்தைக்கு எந்த உணர்வு மன அழுத்தத்தை அதிகமாக்குகிறது, எந்த உணர்வு மனதை மகிழ்ச்சியாக வைத்திருக்க உதவுகிறது என்பதை தெளிவாகக் கற்றுக்கொடுங்கள்.

• தங்களுக்கு ஏற்பட்டுள்ள மன அழுத்தத்தை எப்படி வெளிப்படுத்துவது என்பதை அவர்களுக்கு சொல்லிக்கொடுங்கள்.

• பெண் குழந்தைகள் அழுவதன் மூலமாக தங்கள் மனதை லேசாக்கிக் கொள்வார்கள். ஆண் குழந்தைகளுக்கு இதை நாம் சொல்லித்தருவது அவசியம்.

• தோல்விகளும், துயரங்களும் எல்லோருக்கும் ஏற்படுவதுண்டு. எனவே இது ஏனோ விபரீதமானதோ அல்லது நடக்கக்கூடாததோ அல்ல என்பதை குழந்தைகளுக்கு புரியும்படியாக எடுத்துச் சொல்லுங்கள்.

• அவர்களுக்கு மனமகிழ்ச்சி அளிக்கின்ற செயல்களை செய்வதற்கு அனுமதி அளியுங்கள். அது போன்ற நிகழ்ச்சிகள் நடைபெற வாய்ப்புக்களை ஏற்படுத்திக்கொடுங்கள்.

• மன அழுத்தத்திற்கு ஆளான குழந்தை மற்ற பள்ளித்தோழர்களுடன் சுற்றுலா செல்ல விரும்பினால் மன அழுத்தத்தை காரணம் காட்டி அதை தடுக்காதீர்கள். இந்த மாறுதல் அந்த குழந்தைக்கு மிகவும் அவசியமன சிகிச்சை போன்றது என்பதை உணர்ந்து அதற்கேற்ப நடந்துகொள்ளுங்கள்.

• குழந்தைகளுக்கு பிடித்த விஷயங்களை அவர்கள் செய்யும் போது, சரியாக செய்கிறார்களா என்பதை கவணியுங்கள். சரியான முறையில் செய்யும் போது தவறாமல் பாராட்டுங்கள்.

• தேவைப்பட்ட போது மருத்துவரிடம் அழைத்துச்சென்று இரத்தம், சிறுநீர் ஆகியவற்றை பரிசோதித்துக்கொள்ளுங்கள்.

• குழந்தைகள் நன்றாக உண்ணும்படியாக பார்த்துக்கொள்ளுங்கள். அவர்களுக்கு பிடித்த உணவு வகைகளை கொடுத்து வயிறார சாப்பிடச்செய்யுங்கள்.

• சாதாரண உடற்பயிற்சிகளை வேகமாக நடப்பது, ஓடுவது போன்றவற்றை செய்யச்சொல்லி குழந்தையின் மனஉளைச்சலை குறையுங்கள், நீங்களும் அதில் சேர்ந்து கொள்ளுங்கள்.

• மேற்கண்ட முறைகயை கடைப்பிடித்த பிறகும், மன அழுத்தத்திற்கான காரணத்தை உங்களால் கண்டுபிடிக்க முடியவில்லை என்றாலோ அல்லது குழந்தையின் மன அழுத்தம் குறையவில்லை என்றாலோ குழந்தை மனநல மருத்துவரின் உதவியை தயக்கமில்லாமல், கால தாமதம் செய்யாமலும் நாடுங்கள்.

• மற்றவர்கள் குழந்தையை கேலி செய்வார்களோ அல்லது பைத்தியம் என்று முத்திரை குத்தி விடுவார்களோ என்று பயந்து கொண்டு, விஷயத்தை வெளியே தெரியாமல் மூடி வைக்காதீர்கள்.

• மருத்துவ உதவியை சரியான நேரத்தில் சரியான மருத்துவரிடம் செய்யாமல் போனால் மற்றவர்களை வேண்டுமானால் நீங்கள் திருப்தி படுத்தலாம். ஆனால் உங்கள் செல்லக்குழந்தையின் எதிர்காலம் பாழாகிவிடக்கூடும். எனவே இதை மனதில் கொண்டு உறுதியோடு செயல்படுங்கள்.

குழந்தைகள் களிமண் போன்றவர்கள் பெற்றோரே அதை அழகாக்குவது உங்கள் கைகளில்…

MMM


Leave a Reply

Your email address will not be published. Required fields are marked *

CAPTCHA Image

*

Enable Google Transliteration.(To type in English, press Ctrl+g)
சுவடிக்கூடம்View All