புத்தளத்தில் அதிவேகமாக பரவி வரும் தொற்று நோய்

.

எமது ஊரில் அதிவேகமாக பரவி வரும் தொற்று நோய் ஒன்றை பற்றி எனக்கு தெரிந்தவற்றை பகிர்கிறேன். Crystal Meth எனப்படும் “ஐஸ்” போதைப் பாவனை இன்று புத்தளத்தின் ஒவ்வொரு மூலையிலும் வேர் ஊன்றியிருக்கும் ஒருவகைப் புற்றுநோய் என்பது அனைவரும் அறிந்ததே.

.

11, 12 வயது பாலரைக் கூட விட்டுவைக்காத இக்கொடிய பதார்த்தம் உடலினுள் சென்று எவ்வளவு பாரிய சிதைவுகளை ஏற்படுத்துகிறது என்பதை பார்க்கும் போது அதிர்ச்சியாக உள்ளது. எந்த ஒரு போதை மருந்தை உட்கொள்கையிலும்- பரிசோதித்துப் பார்த்தல், வழமையாக்கிக் கொள்ளுதல், உயர் அபாய பாவனை மற்றும் அடிமையாதல் எனும் நான்கு படிகளைக் கூறலாம். எவ்வாறாயினும் ஐஸ் உட்கொண்ட ஒருவர் அதற்கு அடிமையாகி சீரழிவதற்கு அதிக காலம் எடுக்காது. காகிதத்துண்டின் முனையில் தீயைக் காட்டுவது போல தான், முழுதாக பொசுக்கும் வரையில் விடாது. இதற்கு காரணம் போதை மருந்துகளில் மிகவும் ஆபத்தானது இந்த ஐஸ். மிகச் சிறிய அளவு உட்கொண்டாலும் போதை தலைக்கேறி ஒருவித மாய மயக்க நிலைக்கு நபரை இழுத்துச்செல்லும்.